Vår tid er uroleg. Tryggleik, menneskeverd og grunnleggande verdiar står under press i mykje større grad enn eg hadde sett for meg at eg skulle oppleve i mi levetid. Eg trur ikkje eg er åleine om å streve med å finne fotfeste i det. Med framsyningane «Antigone», «Skammen» og «Marias Testamente» freistar DNS å reflektere over kven vi er som menneske når omstenda rundt oss vert farlege. Kva verdiar er vi villige til å kjempe for og kva plass har sanning og humanisme når maktgriskheit tek over dei narrativa som styrer verda.

Vi er glade og stolte over å ha regissør Alan Øyen «heime» i Bergen att. Med sitt team formidlar han ein «Antigone» for vår tid - og alle tider. Eg  håpar den vil gripe deg og stimulere til tankar og samtalar.

Med «Antigone» inviterer vi inn til den første framsyninga i ei rekke der vi vil møte publikum på nye scener medan vi moderniserer huset på Engen. Eg vil nytte høve til å takke tilsette på DNS for at dei legg ut på eventyr i lag og lagar teater på stader der det ikkje normal vert laga teater. Og så vil eg takke publikum som er nysgjerrige og lojale – og som dermed og vert med ut på eventyr i lag med oss.

Vi treng meir enn nokon sinne å komme i lag og reflektere over kven vi er og kva vi skuldar å stå på vakt for.

Velkommen til DNS på nye scener. Velkommen til DNS på Bergen Kjøtt.